address
Saturday, May 17, 2014
ပြည်ထောင်စု ရွေးကောက်ပွဲ ကော်မရှင်နှင့် စာနယ်ဇင်း အဖွဲ့အစည်းများ တွေ့ဆုံ
ယခုနှစ် ဒီဇင်ဘာ ပထမပတ်တွင် ပြုလုပ်မည့် ကြားဖြတ်ရွေးကောက်ပွဲနှင့် ၂၀၁၅ ခုနှစ် အထွေထွေ ရွေးကောက်ပွဲများတွင် သတင်းရယူရာတွင် အထောက်အကူ ဖြစ်စေရန်နှင့် ရွေးကောက်ပွဲဆိုင်ရာ
နည်းဥပဒေများကို မီဒီယာများမှ ဝေဖန် အကြံပြုနိုင်စေရန် ရွေးကောက်ပွဲ ကော်မရှင်နှင့် စာနယ်ဇင်း အဖွဲ့အစည်းများ မေလ ၁၆ ရက်နေ့တွင် တွေ့ဆုံခဲ့ကြောင်း Reuters သတင်းဌာနမှ ဦးအောင်လှထွန်းက ပြောကြားသည်။
အဆိုပါ တွေ့ဆုံပွဲကို ရန်ကုန်တိုင်းဒေသကြီး Summit Parkview ဟိုတယ်တွင် ပြုလုပ်ခဲ့ပြီး မြန်မာနိုင်ငံ စာနယ်ဇင်းကောင်စီ MJC၊ MJA၊ MJN၊ MJU၊ MRA အဖွဲ့အစည်းများ တက်ရောက်ခဲ့ကြောင်း ၎င်းက ပြောကြားသည်။
“ကျွန်တော်က White Card ကိစ္စကို အဓိကထားပြီး မေးတယ်။ တခြား နိုင်ငံတွေမှာ မရှိတဲ့ ဒီ White Card ကိစ္စကို ဘာလို့ ခွင့်ပြုထားသလို့ မေးတော့ ကော်မရှင်က လွှတ်တော်က ပြဋ္ဌာန်းထားတဲ့ ဥပဒေအတိုင်း လုပ်တာပါ။ သူတို့နဲ့ မဆိုင်ပါဘူးလို့ ပြောတယ်။ နောက်ပြီး အိမ်နီးနားချင်း ဒီမိုကရေစီစနစ် ကျင့်သုံးတဲ့ အိန္ဒိယနိုင်ငံမှာ ကြိုတင်မဲ မရှိဘူး ဆိုတာကို ထောက်ပြခဲ့တယ်” ဟု ၎င်းကဆိုသည်။
ပြည်ထောင်စု ရွေးကောက်ပွဲ ကော်မရှင် ဥက္ကဋ္ဌ ဦးတင်အေးက မီဒီယာများ အနေနှင့် ရွေးကောက်ပွဲ သတင်းများ ရယူ ရေးသားရာတွင် လည်းကောင်း၊ ရွေးကောက်ပွဲနှင့် ဆိုင်သော အချက်အလက်များ မေးမြန်းရာတွင် လည်းကောင်း၊ ရွေးကောက်ပွဲနှင့် ဆိုင်သော ပြည်ထောင်စု ရွေးကောက်ပွဲ ကော်မရှင် ဥပဒေနှင့် နည်းဥပဒေများကို ပိုင်နိုင်စွာ လေ့လာပြီးမှ ရေးသားကြရန် ပြောကြားခဲ့ကြောင်း ယင်းအခမ်းအနားသို့ တက်ရောက်ခဲ့သူ စာနယ်ဇင်းကောင်စီ (ယာယီ) အဖွဲ့ဝင်တစ်ဦးက ဆိုသည်။
ရွေးကောက်ပွဲတွင် မဲပေးပိုင်ခွင့် ရှိသူများ စာရင်းကို ကြိုတင် ထုတ်ပြန်ထားမည် ဖြစ်ရာ ယင်းစာရင်းတွင် မိမိ၏ အမည် မတွေ့ရှိပါက သက်ဆိုင်ရာ ရပ်ကွက်၊ ကျေးရွာအုပ်စု ကော်မရှင်အဖွဲ့ခွဲတွင် အကြောင်းကြားနိုင်ကြောင်း ဦးတင်အေးက ဆိုသည်။
ရွေးကောက်ပွဲ ကော်မရှင်၏ ရပ်တည်ချက်နှင့် တရားမျှတမှု ရှိရန် လိုအပ်ချက်များကို ထောက်ပြ မေးမြန်းခဲ့ကြောင်း သတင်းစာဆရာကြီး ဖိုးသောကြာ (ခေတ်+မိုး) က ပြောကြားသည်။
“ကော်မရှင်ဆိုတာ သမာသမတ် ကျရမယ်။ ပြည်သူများအပေါ်မှာ ရင်ဝယ်သားကဲ့သို့ သဘောထားရမယ့် ပုဂ္ဂိုလ်တွေပဲ ဖြစ်သင့်တယ်။ တရားမျှတမှု ဆိုတာ ကော်မရှင် တစ်ခုတည်း လုပ်လို့မရဘူး။ ကော်မရှင်ကို ပံ့ပိုးတဲ့ အစိုးရကိုယ်တိုင်က မျှတရမယ်။ အဲဒါကြောင့် အစိုးရထဲက ဝန်ထမ်းတွေ တရားမျှတအောင် ကော်မရှင်က တိုက်တွန်းပေးပါလို့ ဆွေးနွေးခဲ့တယ်” ဟု ၎င်းကဆိုသည်။
ရွေးကောက်ပွဲ ကော်မရှင် အဖွဲ့အစည်းအတွင်း တပ်မတော် အရာရှိဟောင်းများ ပါဝင်နေမှုကြောင့် ဝေဖန်မှုများ ရှိသော်လည်း ရွေးကောက်ပွဲများကို လွတ်လပ်မှုနှင့် တရားမျှတမှုရှိရန် လုပ်ဆောင်မည်ဟု ကတိပေးကြောင်း မေလ ၁၅ ရက်နေ့တွင် ပြည်ထောင်စု ရွေးကောက်ပွဲ ကော်မရှင် ဥက္ကဋ္ဌ ဦးတင်အေးက ပြောကြားထားသည်။
လစ်လပ်မဲဆန္ဒနယ် ၃၀ ရှိသောကြောင့် ယခုနှစ် ဒီဇင်ဘာလ ပထမပတ်အတွင်း ကြားဖြတ်ရွေးကောက်ပွဲ ကျင်းပပေးမည် ဖြစ်ပြီး ၂၀၁၅ ရွေးကောက်ပွဲ မဲဆန္ဒရှင်များ စာရင်းကို သြဂုတ်လမှ စတင်ကာ ရှစ်လအတွင်း ကောက်ယူမည် ဖြစ်ပြီး မဲဆန္ဒရှင်များ အနေနှင့် စာရင်းအတွင်း မပါရှိပါက သက်ဆိုင်ရာ ကော်မရှင် ရုံးများထံသို့ ဆက်သွယ် မေးမြန်းကြရန် ရွေးကောက်ပွဲ ကော်မရှင်က ထုတ်ပြန်ထားသည်။
The Voice
Subscribe to:
Post Comments (Atom)
No comments:
Post a Comment