ကျန်းမာရေး ဝန်ဆောင်မှု အလိုအပ်ဆုံး ဒေသများအတွက် ဆွီဒင်ကူညီမည်

1.2.2014

မြန်မာနိုင်ငံ၏ ကျန်းမာရေးစနစ် တိုးတက်လာစေရန်အတွက် ဆွီဒင်နိုင်ငံ အပါအဝင် ဥရောပနိုင်ငံ ရှစ်နိုင်ငံက ပူးတွဲ ထောက်ပံ့ထားသော ထောင်စုနှစ် ဖွံ့ဖြိုး တိုးတက်ရေး ရည်မှန်းချက်သုံးမျိုး ရန်ပုံငွေ (3MDG) ကို ဆွီဒင်အစိုးရက အမေရိကန်ဒေါ်လာ သန်းသုံးဆယ် ထပ်မံပေးအပ်သွားမည် ဖြစ်ကြောင်း 3MDG ၏ ပြန်ကြားရေး အရာရှိ Mr.James Howlett က ပြောကြားသည်။

အဆိုပါ သန်းသုံးဆယ်ကို မြန်မာနိုင်ငံရှိ ကျန်းမာရေး ဝန်ဆောင်မှု အလိုအပ်ဆုံး ဒေသများအတွက် ကူညီပံ့ပိုးရန် ပေးအပ်ခဲ့ခြင်း ဖြစ်ကြောင်း ၎င်းကထပ်လောင်း ပြောကြားသည်။

မြန်မာနိုင်ငံအတွင်း ကျန်းမာရေး ဝန်ဆောင်မှုများ ဆောင်ရွက်နေသော 3MDG အတွက် ဆွီဒင်နိုင်ငံသည် လေးခုမြောက် အများဆုံး ကူညီသောနိုင်ငံ ဖြစ်ကြောင်း 3MDG ၏ ထုတ်ပြန်ချက်တွင် ဖော်ပြထားသည်။

ဥရောပနိုင်ငံ ရှစ်နိုင်ငံက 3MDG ကို ထောက်ပံ့ထားသော ရန်ပုံငွေ အမေရိကန်ဒေါ်လာ သန်း ၃၃၀ နှင့် မြန်မာနိုင်ငံအတွင်း မိခင်နှင့် ကလေးကျန်းမာရေး စောင့်ရှောက်မှုများ၊ တီဘီနှင့် ငှက်ဖျားရောဂါတိုက် ဖျက်ရေး၊ HIV/AIDS ရောဂါ ကျဆင်းရေးတို့အတွက် သုံးစွဲသွားမည် ဖြစ်ပြီး ယခု ဆွီဒင်နိုင်ငံ၏ ထပ်တိုး ရန်ပုံငွေကိုလည်း အဆိုပါ ကဏ္ဍများတွင် သုံးစွဲရန် လျာထားကြောင်း ဆက်လက် ဖော်ပြထားသည်။

ကျန်းမာရေးဝန်ကြီးဌာနနှင့် ချိတ်ဆက် လုပ်ကိုင်နေသော နိုင်ငံတကာ အလှူရှင် အဖွဲ့အစည်းများတွင် 3MDG သည် ရန်ပုံငွေအများဆုံး ထောက်ပံ့ထားသော ရန်ပုံငွေအဖွဲ့တစ်ခု ဖြစ်သည်။

The Voice Weekly